நாயகன் சித்தார்த் தனது நண்பர்களான பிரியா பவானி சங்கர், ஜெகன், ரிஷி ஆகியோருடன் இணைந்து யூடியூப் சேனல் நடத்தி வருகிறார். இதன் மூலம் சமுதாயத்தில் நடக்கும் குற்றங்களை வெளிச்சம் போட்டு காட்டி வருகிறார். இந்நிலையில் அரசு வேலைக்கு லஞ்சம் கேட்டதால் ஒரு பெண் தற்கொலை செய்து இறந்து விடுகிறார். இதை பார்க்கும் சித்தார்த் நியாயம் கேட்டு போராடுகிறார்.
ஆனால், பலன் கிடைக்காமல் போகிறது. மேலும் சிறைக்கு செல்கிறார். காதலி ரகுல் ப்ரீத் சிங் அவர்களை விடுவித்து, உங்களால் எதுவும் முடியாது என்று கூறுகிறார். விரக்தி அடையும் சித்தார்த், இந்தியன் தாத்தா உயிருடன் இருக்கிறார் என்று உள் மனது சொல்கிறது. அவரை கண்டுபிடிக்க வேண்டும் என்று நண்பர்களுடன் சொல்கிறார்.
இறுதியில் இந்தியன் தாத்தா கமல் ஹாசன், ஊழல் செய்பவர்களுக்கு எதிராக என்ன நடவடிக்கை எடுத்தார்? என்ன மாற்றம் நடந்தது? சிபிஐ அதிகாரி பாபி சிம்ஹா, கமல் ஹாசனை பிடித்தாரா? என்பதே படத்தின் மீதிக்கதை.
தற்போது உள்ள இளைஞர்களின் பிரதிபலிப்பாக சித்தார்த் நடித்து இருக்கிறார். குறிப்பாக தாய் இறப்பிற்கு வருந்தும் காட்சியில் கண்கலங்க வைத்து இருக்கிறார். இவருக்கு துணையாக வரும் பிரியா பவானி சங்கர், ஜெகன், ரிஷி ஆகியோர் கொடுத்த வேலையை சிறப்பாக செய்து இருக்கிறார்கள். வித்தியாசமான தோற்றத்தில் நடித்து கவர்ந்து இருக்கிறார் எஸ்.ஜே.சூர்யா.
ரவிவர்மனின் ஒளிப்பதிவு கண்களுக்கு விருந்து படைத்து இருக்கிறது.அனிருத் இசையில் பாடல்கள் அனைத்தும் சூப்பர் ஹிட். பின்னணி இசை மூலம் காட்சிகளுக்கு உயிர் கொடுத்து இருக்கிறார்.லைகா ப்ரொடக்ஷன்ஸ் மற்றும் ரெட் ஜெயண்ட் மூவீஸ் இணைந்து இந்தியன் 2 திரைப்படத்தை தயாரித்துள்ளனர்.
